ಗೆಲುವು -ಸೋಲು ಎಲ್ಲವೂ ನಮ್ಮದೇ. ಕೆಲವರಿಗೆ ಮಾತ್ರ ಸರ್ಕಾರಿ ಉದ್ಯೋಗ ಸಿಗುತ್ತದೆ. ಸಾಕಷ್ಟು ಜನರಿಗೆ ಈ ಹುದ್ದೆ ಸಿಗಲ್ಲ. ಆಗಂತ ಇಲ್ಲಿಗೆ ಬದುಕು ಕೊನೆಯಲ್ಲ. ಅದಕ್ಕಿಂತ ಮಿಗಿಲಾದ ಜೀವನ ಮತ್ತೊಂದು ಇದೆ. ಆದರೆ ಸ್ಪರ್ಧಾತ್ಮಕ ಪರೀಕ್ಷೆಗಳಿಗಾಗಿ ವಿದ್ಯಾರ್ಥಿಗಳು ಆದ ನಾವು ಮಾಡೋ ಪ್ರಯತ್ನ ಮಾಡಬೇಕು. ಸಿಗುವ ಫಲ ಕೊಂಚ ಲೇಟ್ ಆಗಿ ಆದರೂ ಸಿಗಬಹುದು. ಅದು ಸರ್ಕಾರಿ ಹುದ್ದೆಗಿಂತ ಸ್ವೀಟ್ ಆಗಿರುತ್ತೆ. ಸದ್ಯ ಸ್ಪರ್ಧಾತ್ಮಕ ಪರೀಕ್ಷೆ ಬಗ್ಗೆ ಏನೇನು ಓದಬೇಕು ಎನ್ನುವುದ ಕುರಿತು ಸ್ವಲ್ಪ ಮಾಹಿತಿ ನಿಮಗಾಗಿ ಇಲ್ಲಿದೆ.
ಸ್ಪರ್ಧಾತ್ಮಕ ಪರೀಕ್ಷೆಯನ್ನ ಒಂದು ದಿನದಲ್ಲೋ, ವಾರನೋ ಅಥವಾ ತಿಂಗಳದಲ್ಲೋ ಓದಿ ಪಾಸ್ ಮಾಡುತ್ತೇನೆ ಎನ್ನುವುದು ಬರೀ ಮಾತು ಅಷ್ಟೇ. ಈ ಪರೀಕ್ಷೆ ಎಂದರೆ ಅಷ್ಟು ಸಾಮಾನ್ಯವಲ್ಲ. ಏಕೆಂದರೆ ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ಇರುವಂತ ಕೋಚಿಂಗ್ ಸೆಂಟರ್ಗಳಲ್ಲಿ ಅಭ್ಯರ್ಥಿಗಳು ಕೋಚಿಂಗ್ ಪಡೆದುಕೊಂಡರು ಒಂದು ಪರೀಕ್ಷೆಯಲ್ಲಿ ಪಾಸ್ ಆಗುವುದು ಕೇವಲ 5,ರಿಂದ 8 ಅಭ್ಯರ್ಥಿಗಳು ಮಾತ್ರ.
ಈ ಪರೀಕ್ಷೆಗಾಗಿ ಅಭ್ಯರ್ಥಿಗಳು ಸಮಯ ಮೀಸಲು ಇಟ್ಟಿರಬೇಕು. 10ನೇ ತರಗತಿ, ಪಿಯುಸಿ, ಪದವಿ ಪರೀಕ್ಷೆಗಳಿಗೆ ಓದಿದಕ್ಕಿಂತ ನೂರು ಪಟ್ಟು ಶ್ರಮ ಹಾಕಬೇಕು. ಶಾಲಾ-ಕಾಲೇಜು ಪರೀಕ್ಷೆಗಳಲ್ಲಿ ನಿರ್ದಿಷ್ಟ ಪುಸ್ತಕಗಳಿಂದ ಪ್ರಶ್ನೆ ಬರುತ್ತವೆ ಎಂದು ಕನ್ಫರ್ಮ್ ಆಗಿ ಹೇಳಬಹುದು. ಆದರೆ ಸ್ಪರ್ಧಾತ್ಮಕ ಪರೀಕ್ಷೆಯಲ್ಲಿ ಯಾವುದೇ ನಿರ್ದಿಷ್ಟ ಪುಸ್ತಕದಿಂದ ಪ್ರಶ್ನೆ ಬರುತ್ತವೆ ಎಂದು ಊಹೆ ಮಾಡುವುದಕ್ಕೂ ಆಗುವುದಿಲ್ಲ.
ಇದೇ ಬುಕ್ನಿಂದ ಇದೇ ಪ್ರಶ್ನೆ ಬರುತ್ತದೆ ಹೇಳುವುದಕ್ಕೆ ಆಗಲ್ಲ. ಅರ್ಜಿ ಬಿಟ್ಟಾಗ ಸಿಲಬಸ್ ಕೊಟ್ಟಿರುತ್ತಾರೆ. ಆದರೂ ಪರೀಕ್ಷೆಯಲ್ಲಿ ಅದಕ್ಕಿಂತ ಮಿಗಿಲಾದ ಪ್ರಶ್ನೆಗಳು ಬಂದಿರುತ್ತವೆ. ಹೀಗಾಗಿ ಸರ್ಕಾರಿ ಉದ್ಯೋಗ ಬೇಕೆಬೇಕು ಎನ್ನುವ ಅಭ್ಯರ್ಥಿಗಳು ವರ್ಷಗಳವರೆಗೆ ನಿರಂತರ ಪ್ರಯತ್ನದಲ್ಲಿ ಇರಬೇಕು. ಪ್ರಚಲಿತ ವಿದ್ಯಾಮಾನಗಳ ಅರಿವಿರಬೇಕೆ ಹೊರತು, ಊರಲ್ಲಿ, ನಿಮ್ಮ ಸ್ನೇಹಿತರು, ಹಳ್ಳಿಯಲ್ಲಿ ನಡೆಯುವಂತ ಕೆಲ ಕೆಟ್ಟ ಸಂಗತಿಗಳ ತಲೆ ಕೆಡಿಸಿಕೊಳ್ಳಬಾರದು.
ಸ್ಪರ್ಧಾತ್ಮಕ ಪರೀಕ್ಷಾರ್ಥಿಗಳು ಯಾವ ಯಾವ ವಿಷಯದ ಬಗ್ಗೆ ಗಮನ ಹರಿಸಬೇಕು.
- ಪ್ರಾಥಮಿಕ, ಪ್ರೌಢ ಶಿಕ್ಷಣದ ಪುಸ್ತಕಗಳು- 5 ರಿಂದ 10ನೇ ತರಗತಿ.
- ಮೊದಲ ಮತ್ತು ದ್ವಿತೀಯ ಪಿಯುಸಿ ಪುಸ್ತಕಗಳು.
- ಭೂಗೋಳ ಶಾಸ್ತ್ರ (ವಿಶ್ವ, ಏಷ್ಯಾ, ದೇಶ, ರಾಜ್ಯ, ಜಿಲ್ಲೆಗಳ ಪ್ರಮುಖ ಮಾಹಿತಿ).
- ಇತಿಹಾಸ (ದಕ್ಷಿಣ ಭಾರತ, ಉತ್ತರ ಭಾರತ, ಕರ್ನಾಟಕದ ಸಾಮ್ರಾಜ್ಯಗಳು, ಭಾರತದ ಸಾಮ್ರಾಜ್ಯಗಳು, ಆರಂಭ ಮತ್ತು ಕೊನೆ).
- ಮೊಘಲ ರಾಜರ ಅಂತ್ಯ ಆರಂಭ, ಸಾಧನೆ, ಹೆಸರುಗಳು, ಅವರ ಕೆಲ ಯೋಜನೆ, ಯುದ್ಧಗಳು.
- ಸಂವಿಧಾನ (ಭಾರತದ ಸಂವಿಧಾನ, ಆರ್ಟಿಕಲ್, ಹಕ್ಕುಗಳು, ನ್ಯಾಯಂಗ, ರಾಷ್ಟ್ರಪತಿ, ಪ್ರಧಾನಿ, ಸಿಎಂ ಇತ್ಯಾದಿ ).
- ದಿನಪತ್ರಿಕೆಗಳು (ಓದುವುದರ ಜೊತೆ ಪಾಯಿಂಟ್ಸ್ ಮಾಡಿಕೊಳ್ಳಬೇಕು).
- ಕನ್ನಡ, ಇಂಗ್ಲಿಷ್ ವ್ಯಾಕರಣ (ಕೆಲವು ಪರೀಕ್ಷೆಗಳಲ್ಲಿ ಇದನ್ನು ಕೇಳುತ್ತಾರೆ).
- ಬೇಸಿಕ್ ಕಂಪ್ಯೂಟರ್ ಜ್ಞಾನ (ಇತ್ತೀಚಿನ ಪರೀಕ್ಷೆಗಳಲ್ಲಿ ಪ್ರಶ್ನೆಗಳಿರುತ್ತವೆ).
- ಭಾರತದ ಮ್ಯಾಪ್ ಬಗ್ಗೆ ಸಂಪೂರ್ಣ ಜ್ಞಾನ ಇರಬೇಕು.
- ದಿಕ್ಕುಗಳು, ನಕ್ಷೆಗಳು, ಸ್ಥಳಗಳ ಬಗ್ಗೆ ಸಂಪೂರ್ಣ ಮಾಹಿತಿ ಇರಲಿ.
- ರೈಲ್ವೆ ಇಲಾಖೆಯ ಮಾಹಿತಿ ಸ್ವಲ್ಪ ಮಟ್ಟಿಗೆ ತಿಳಿದಿರಬೇಕು.
- ಸಂಖ್ಯಾಶಾಸ್ತ್ರದ ಬಗ್ಗೆ ತಿಳಿದಿರಬೇಕು.
- ಹಾಗೂ ನೀವು ಶಾಲೆಯಲ್ಲಿ ಅಭ್ಯಾಸ ಮಾಡಿದ ಪುಸ್ತಕಗಳನ್ನೇ ಪುನಃ ಪರೀಕ್ಷಿಸಿ ನೋಡಿ.
ನಿಮಗೆ ಓದಲು ಬೇಕಾದ ಸಾಮರ್ಥ್ಯ.
- ವ್ಯವಸ್ಥಿತ ಯೋಜನೆ ಅತ್ಯಗತ್ಯ:ಸ್ಪರ್ಧಾತ್ಮಕ ಪರೀಕ್ಷೆಗಳ ಪಠ್ಯಕ್ರಮ ತುಂಬಾ ಕಠಿಣವಾಗಿರುತ್ತದೆ. ಅದಕ್ಕಾಗಿಯೇ ಸರಳ ಮತ್ತು ಪರಿಣಾಮಕಾರಿ ಯೋಜನೆಯನ್ನು ನಾವು ಮೊದಲೇ ಸಿದ್ಧಪಡಿಸಿಟ್ಟುಕೊಳ್ಳಬೇಕು. ಹೆಚ್ಚಿನ ಜನರು ಪಠ್ಯಕ್ರಮದ ಪ್ರಮುಖ ಭಾಗಗಳನ್ನು ಮಾತ್ರ ಓದುತ್ತಾರೆ. ಇದು ಸರಿಯಾದ ವಿಧಾನವಲ್ಲ. ಎಲ್ಲ ವಿಭಾಗಗಳಿಗೂ ಸಮಾನ ಆದ್ಯತೆ ನೀಡಬೇಕು. ಮೊದಲು ನಿಮಗಿಷ್ಟದ ಹಾಗೂ ಹೆಚ್ಚು ಆಸಕ್ತಿ ಹೊಂದಿರುವ ವಿಷಯಗಳನ್ನು ಮತ್ತು ಸುಲಭವಾದ ವಿಷಯಗಳನ್ನು ಪೂರ್ಣಗೊಳಿಸಬೇಕು. ನಂತರ ಕಷ್ಟಕರವಾದ ವಿಷಯಗಳ ಮೇಲೆ ನಿಮ್ಮ ಗಮನವನ್ನು ಕೇಂದ್ರೀಕರಿಸಿ ಇಟ್ಟುಕೊಳ್ಳಬೇಕು. ಸಂಪೂರ್ಣ ಪಠ್ಯಕ್ರಮವನ್ನು ಪೂರ್ಣಗೊಳಿಸಿದ ನಂತರ, ಸ್ಯಾಂಡ್ವಿಚ್ ವಿಧಾನವನ್ನು ಬಳಸಬೇಕು. ಅಂದರೆ ನಿಮ್ಮ ನೆಚ್ಚಿನ ವಿಷಯಗಳ ನಡುವೆ ನೀವು ಕಷ್ಟಕರವಾದ ವಿಷಯಗಳನ್ನು ಜೋಡಿಸಿಕೊಂಡು ಅಧ್ಯಯನ ಮಾಡಬೇಕು. ಹಾಗಾದಾಗ ದೀರ್ಘಕಾಲದವರೆಗೆ ಓದಿದನ್ನು ತಲೆಯಲ್ಲಿ ಇಟ್ಟುಕೊಳ್ಳಬಹುದು.
- ನಿಧಾನ ಓದು ಸರಿಯಲ್ಲ: ಅವರು ಒಂದೇ ವಾಕ್ಯವನ್ನು ಮತ್ತೆ ಮತ್ತೆ ಓದುತ್ತಾರೆ. ಇದು ಒಳ್ಳೆಯ ಅಭ್ಯಾಸವಲ್ಲ. ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ತಯಾರಿ ಮಾಡುವ ಸಮಯ ಬಹಳ ಕಡಿಮೆ ಇರುತ್ತದೆ. ಅದಕ್ಕಾಗಿಯೇ ವೇಗ ಓದುವ ವಿಧಾನವನ್ನು ಅಭ್ಯಾಸ ಮಾಡಬೇಕು. ನಿಮಿಷಕ್ಕೆ ಕನಿಷ್ಠ 600-800 ಪದಗಳನ್ನು ಓದುವುದನ್ನು ಅಭ್ಯಾಸ ಮಾಡಿಕೊಳ್ಳುವುದು ಪರೀಕ್ಷಾ ದೃಷ್ಟಿಯಿಂದ ಉತ್ತಮ. ಮೊದಲಿಗೆ ಈ ವಿಧಾನ ಕಷ್ಟ ಎಂಬಂತೆ ತೋರುತ್ತದೆ. ಆದರೆ, ಒಮ್ಮೆ ನೀವು ಅದನ್ನು ಬಳಸಿದರೆ, ಅದು ಅದ್ಭುತವಾಗುತ್ತದೆ. ಕೆಲವರು ಜೋರಾಗಿ ಓದುತ್ತಾರೆ. ಇದು ಸರಿಯಾದ ವಿಧಾನವಲ್ಲ. ಪೂರ್ಣ ಏಕಾಗ್ರತೆಯಿಂದ ಓದಿ. ಇದನ್ನು ನಿರಂತರವಾಗಿ ಅಭ್ಯಾಸ ಮಾಡಬೇಕು.
- ಪುನಃ ಪುನಃ ಅಭ್ಯಾಸ ಮಾಡಿ: ನಾವು ಎಷ್ಟೇ ಬುದ್ಧಿವಂತರಾಗಿದ್ದರೂ ಅಭ್ಯಾಸ ಮಾಡುವುದನ್ನು ನಿಲ್ಲಿಸಬಾರದು. ಅನೇಕರು ಒಮ್ಮೆ ಓದಿ ಬಿಟ್ಟು ಬಿಡುತ್ತಾರೆ. ಹೀಗೆ ಮಾಡುವುದರಿಂದ ಪರೀಕ್ಷಾ ತಯಾರಿ ಟೆನ್ಷನ್ನಲ್ಲಿ ಮರೆತುಹೋಗಬಹುದು. ಇದು ಸರಿಯಾದ ವಿಧಾನವಲ್ಲ. ಅಧ್ಯಯನ ಮಾಡಿದ ವಿಷಯದ ಪ್ರಮುಖ ಅಂಶಗಳನ್ನು ನಾವು ಆಗಾಗ ಗಮನಿಸಬೇಕು. ಈ ಟಿಪ್ಪಣಿಗಳನ್ನು ನಿಯಮಿತವಾಗಿ ಪರಿಷ್ಕರಿಸಬೇಕು. ತಾರ್ಕಿಕ ಮತ್ತು ಪರಿಮಾಣಾತ್ಮಕ ಯೋಗ್ಯತೆಯಂತಹ ವಿಷಯಗಳನ್ನು ನಿಯಮಿತವಾಗಿ ಅಭ್ಯಾಸ ಮಾಡಬೇಕು. ಇದನ್ನು ಆಗಾಗ ಅಭ್ಯಾಸ ಮಾಡಿದರೆ ಓದಿದ್ದು ನೆನಪಿನಲ್ಲಿ ಉಳಿಯುತ್ತದೆ. ವಿಷಯದ ಬಗ್ಗೆ ಹೆಚ್ಚು ತಿಳುವಳಿಕೆ ಉಂಟಾಗುತ್ತದೆ. ಹೀಗೆ ಮಾಡುವುದರಿಂದ ಸುಲಭವಾಗಿ ಮನಸಿನಿಂದ ಅಳಿಯುವುದಿಲ್ಲ.
- ಪವರ್ ರೀಡಿಂಗ್: ಪುಸ್ತಕದಲ್ಲಿನ ವಿಷಯವನ್ನು ವೇಗವಾಗಿ ಅರ್ಥಮಾಡಿಕೊಳ್ಳಲು ಪವರ್ ರೀಡಿಂಗ್ ಮಾರ್ಗ ಉಪಯುಕ್ತವಾಗಿದೆ. ಪವರ್ ರೀಡಿಂಗ್ ಎಂದರೆ ಅನಾವಶ್ಯಕ ಮತ್ತು ಮುಖ್ಯವಲ್ಲದ ಅಂಶಗಳನ್ನು ಬದಿಗಿಟ್ಟು ಓದುವುದನ್ನು ಮುಂದುವರಿಸುವ ಒಂದು ವಿಧಾನ. ಪ್ರಮುಖ ಅಂಶಗಳನ್ನು ಮನಸ್ಸಿನಲ್ಲಿಟ್ಟುಕೊಳ್ಳುವುದೇ ಈ ವಿಧಾನದ ಮುಖ್ಯ ಉದ್ದೇಶವಾಗಿದೆ. ಸರಳವಾಗಿ ಹೇಳುವುದಾದರೆ, ಪವರ್ ರೀಡಿಂಗ್ ಮೆದುಳಿಗೆ ತಾನು ಓದುವ ಅಮೂಲ್ಯವಾದ ಮಾಹಿತಿಯನ್ನು ಉಳಿಸಿಕೊಳ್ಳಲು ಸಹಾಯ ಮಾಡುತ್ತದೆ. ನೀವು ಸಂಪೂರ್ಣ ಪಠ್ಯಕ್ರಮವನ್ನು ಕಡಿಮೆ ಸಮಯದಲ್ಲಿ ಕವರ್ ಮಾಡಲು ಬಯಸಿದರೆ, ಈ ಪವರ್ ರೀಡಿಂಗ್ ವಿಧಾನವು ತುಂಬಾ ಒಳ್ಳೆಯದು.
- ನಿಮ್ಮದೇ ಆದ ಸೂಕ್ತ ವಿಧಾನ ಅನುಸರಿಸಿ: ಅನೇಕ ಅಭ್ಯರ್ಥಿಗಳು, ಈಗಾಗಲೇ ಪರೀಕ್ಷೆಯಲ್ಲಿ ಯಶಸ್ವಿಯಾದವರ ವೇಳಾಪಟ್ಟಿ ಮತ್ತು ಯೋಜನೆಗಳನ್ನು ಅನುಸರಿಸಲು ಪ್ರಯತ್ನಿಸುತ್ತಾರೆ. ಆದರೆ ಇದು ಸರಿಯಲ್ಲ. ಒಂದು ವಿಧಾನವು ಇನ್ನೊಂದಕ್ಕೆ ಸರಿಹೊಂದುವುದಿಲ್ಲ. ಅದಕ್ಕಾಗಿಯೇ ನಿಮಗೆ ಅನುಕೂಲಕರವಾದ ಯೋಜನೆ ಮತ್ತು ವೇಳಾಪಟ್ಟಿಯನ್ನು ನೀವೇ ಅಣಿ ಮಾಡಿಕೊಳ್ಳುವುದು ಉಚಿತ ಮಾರ್ಗವಾಗಿರುತ್ತದೆ.
- ವಿಶ್ರಾಂತಿ ಅತ್ಯಗತ್ಯ: ಕೆಲವು ಜನರು ಸಿದ್ಧತೆಯನ್ನು ಪ್ರಾರಂಭಿಸಿದ ನಂತರ ಎಲ್ಲ ಇತರ ಚಟುವಟಿಕೆಗಳನ್ನು ಬಿಟ್ಟುಬಿಡುತ್ತಾರೆ. ಇದು ಸರಿಯಾದ ವಿಧಾನವಲ್ಲ. ನಮ್ಮ ಮೆದುಳಿಗೆ ಸ್ವಲ್ಪ ವಿಶ್ರಾಂತಿ ಬೇಕು. ಅದಕ್ಕಾಗಿಯೇ ನೀವು ಬೆಳಗ್ಗೆ ಮತ್ತು ಸಂಜೆ ಸಣ್ಣ ವ್ಯಾಯಾಮ ಮತ್ತು ಆಟಗಳನ್ನು ಮಾಡಬೇಕು. ನಿಮ್ಮ ಅಧ್ಯಯನವನ್ನು ವಾರಾಂತ್ಯದಲ್ಲಿ ಪಕ್ಕಕ್ಕೆ ಇರಿಸಿ ಮತ್ತು ನೀವು ಆಸಕ್ತಿ ಹೊಂದಿರುವುದನ್ನು ಮಾಡಿ. ಆಗ ಮಾತ್ರ ನಿಮ್ಮ ಮನಸ್ಸು ಶಾಂತವಾಗಿರುತ್ತದೆ. ಆರೋಗ್ಯವೂ ಚೆನ್ನಾಗಿರುತ್ತದೆ. ಇನ್ನು ಕೆಲವರು ಊಟ, ನಿದ್ದೆ ಮಾಡದೆ ಓದುತ್ತಾರೆ. ಇದು ಸರಿಯಾದ ವಿಧಾನವೂ ಅಲ್ಲ. ಇವು ನಮ್ಮ ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರುತ್ತವೆ. ಜೊತೆಗೆ ನೆನಪಿನ ಶಕ್ತಿಯೂ ಕಡಿಮೆಯಾಗುತ್ತದೆ. ಆದ್ದರಿಂದಲೇ ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ತಯಾರಿ ನಡೆಸುತ್ತಿರುವವರಿಗೆ ಸರಿಯಾದ ನಿದ್ದೆ ಮತ್ತು ಉತ್ತಮ ಪೌಷ್ಟಿಕ ಆಹಾರ ಅತ್ಯಗತ್ಯ.
- ಮಾನಸಿಕ ಸ್ಥಿರತೆ ಅತ್ಯಗತ್ಯ: ಅನೇಕ ಜನರು ತಮ್ಮ ತಯಾರಿಯನ್ನು ಉತ್ತಮ ಉತ್ಸಾಹದಿಂದ ಪ್ರಾರಂಭಿಸುತ್ತಾರೆ. ಆದರೆ ಅದನ್ನು ಮುಂದುವರಿಸಲು ಅವರಿಗೆ ಸಾಧ್ಯವಾಗುವುದಿಲ್ಲ. ಇದಕ್ಕೆ ಮುಖ್ಯ ಕಾರಣ ಸೋಮಾರಿತನ. ಇನ್ನು ಕೆಲವರು ತಮ್ಮ ಸುತ್ತಲಿರುವವರ ಮಾತಿನಿಂದ ಹತಾಶರಾಗುತ್ತಾರೆ ಮತ್ತು ಸರಿಯಾಗಿ ತಯಾರಿ ಮಾಡಿಕೊಳ್ಳಲು ಸಾಧ್ಯವಾಗುವುದಿಲ್ಲ. ಇಂದಿನ ಕಾಲಘಟ್ಟದಲ್ಲಿ ಸ್ಪರ್ಧಾತ್ಮಕ ಪರೀಕ್ಷೆಗಳು ಪ್ರಹಸನವಾಗಿವೆ. ಆದ್ದರಿಂದ ನೀವು ದೀರ್ಘಾವಧಿಯ ತಯಾರಿಗಾಗಿ ಮಾನಸಿಕವಾಗಿ ಸಿದ್ಧರಾಗಿರಬೇಕು.
- ಅಗತ್ಯವಿದ್ದರೆ, ತಜ್ಞರ ಸಲಹೆಯನ್ನು ತೆಗೆದುಕೊಳ್ಳಿ. ಉತ್ತಮ ಬ್ಯಾಚ್ನೊಂದಿಗೆ ಗ್ರೂಪ್ ಸ್ಟಡಿ ಮಾಡಬಹುದು. ಆದರೆ ನಕಾರಾತ್ಮಕ ಆಲೋಚನೆಗಳನ್ನು ಹೊಂದಿರುವ ಜನರು ದೂರವಿರಬೇಕು. ಹಳೆಯ ಪತ್ರಿಕೆಗಳನ್ನು ಅಭ್ಯಾಸ ಮಾಡಿ. ಪ್ರಸ್ತುತ ವ್ಯವಹಾರಗಳ ಮೇಲೆ ವಿಶೇಷ ಗಮನ ಹರಿಸಿ.
ಓದಲು ತಮ್ಮದೇ ಆದ ಸಮರ್ಪಕ್ಕ ಟೈಮ್ ಟೇಬಲ್ ಅನ್ನು ನಿರ್ಮಿಸಿಕೊಳ್ಳಿ.
- ಸರ್ಕಾರಿ ಉದ್ಯೋಗಕ್ಕೆ ಅರ್ಜಿ ಕರೆದ ಮೇಲೆ ಇನ್ನೆಷ್ಟು ದಿನಗಳು ಬಾಕಿ ಎನ್ನುವುದರ ಆಧಾರದ ಮೇಲೆ ವೇಳಾಪಟ್ಟಿ ಸಿದ್ಧಪಡಿಸಿಕೊಳ್ಳಿ.
- ಓದುವುದಕ್ಕೆ ಹೆಚ್ಚಿನ ಸಮಯ ಮೀಸಲಿಡಿ.
- ನಿದ್ದೆ, ಊಟ, ಸೇರಿದಂತೆ ಇತ್ಯಾದಿ ನಿತ್ಯಕರ್ಮಗಳನ್ನ ಬೇಗ ಮುಗಿಸಬೇಕು.
- ಯಾರೂ ಇಲ್ಲದ ಪ್ರದೇಶ, ನಿಶಬ್ಧವಾಗಿರುವ ಪ್ರದೇಶದ ಆಯ್ಕೆ ನಿಮ್ಮದಾಗಲಿ.
- ಓದಿದ್ದನ್ನ ಪುನರ್ ಮನನ (ರಿವೀಸನ್) ಮಾಡಿಕೊಳ್ಳಲು ಪ್ರತ್ಯೇಕ ಸಮಯ ಇಡಿ.
- ನಿಮ್ಮ ಗಮನವನ್ನು ಬೇರೆಲ್ಲಡೆ ಹರಿಸದೆ ಓದುವುದಕ್ಕಾಗಿ ಮಾತ್ರವೇ ಮೀಸಲಿಡಿ.
ಓದುವುದರಲ್ಲಿ ತೊಡಗಿಕೊಳ್ಳಬೇಕೆಂದರೆ ಈ ತಪ್ಪುಗಳನ್ನು ಮಾಡಬೇಡಿ.
- ಕೀ ಪ್ಯಾಡ್ ಮೊಬೈಲ್ ಬಳಕೆ ಮಾಡಿದರೆ ಉತ್ತಮ.
- ಮೊಬೈಲ್, ಟಿವಿ, ಕಂಪ್ಯೂಟರ್, ಟ್ಯಾಬ್ ಇತ್ಯಾದಿಗಳಿಂದ ದೂರ.
- ಓದುವಾಗ ಸ್ನೇಹಿತರು ಕರೆದರೆ ಹೋಗುವುದು ಕಡಿಮೆ ಮಾಡಿ.
- ಮನೆಯ ಕೆಲ ಕೆಲಸ ಬೇಗ ಮುಗಿಸಿ ಪುಸ್ತಕ ಹಿಡಿದುಕೊಳ್ಳಬೇಕು.
- ಸಿನಿಮಾ, ಮನರಂಜನೆ, ಹಾಡು ಕೇಳುವುದು ಸ್ಟಾಪ್ ಮಾಡಿ.
- ನಿಮ್ಮ ಪೂರ್ತಿ ಗಮನವನ್ನು ಓದುವುದಕ್ಕಾಗಿ ಮೀಸಲಿಡಬೇಕು.
ಹೆಚ್ಚು ಹೆಚ್ಚು ಗ್ರಂಥಾಲಯಗಳಿಗೆ ಭೇಟಿ ನೀಡಿ, ನಿಮಗೆ ಬೇಕಾದ ನ್ಯೂಸ್ಪೇಪರ್ ಸೇರಿದಂತೆ ಪುಸ್ತಕಗಳ ಪರಿಚಯ ಆಗುತ್ತದೆ. ಸ್ಪರ್ಧಾತ್ಮಕ ಪರೀಕ್ಷೆಗೆ ಸಂಬಂಧಪಟ್ಟ ಕೆಲ ಮಾಸಿಕ ಪತ್ರಿಕೆಗಳು (ಸ್ಪರ್ಧಾ ಸ್ಪೂರ್ತಿ, ಸ್ಪರ್ಧಾ ಚೈತ್ರಾ, ಸ್ಪರ್ಧಾ ವಿಜೇತಾ, ಚಾಣಕ್ಯ, ಉದ್ಯೋಗ ವಾರ್ತೆ, ಪತ್ರಿಕೆಗಳಲ್ಲಿ ಬರುವ ಶಿಕ್ಷಣ ಸಂಪ್ಲಿಮೆಂಟರಿ) ನಿಮಗೆ ಅಲ್ಲಿ ದೊರೆಯುತ್ತವೆ. ಲೇಖಕರ ಪುಸ್ತಕಗಳ ಬಗ್ಗೆ ಅರಿವು ಬರುತ್ತದೆ. ಇಂಗ್ಲಿಷ್ ಪತ್ರಿಕೆಗಳನ್ನು ಓದುವುದರಿಂದ ಟ್ರಾನ್ಸಲೇಟ್ (ತರ್ಜುಮೆ) ಈಸಿ ಆಗುತ್ತದೆ. ಒಂದೇ ಸಂಸ್ಥೆಯ ಪತ್ರಿಕೆಗಳನ್ನು ಓದುವುದರಿಂದ ಟ್ರಾನ್ಸಲೇಟ್ ಸುಲಭವಾಗುತ್ತದೆ. ಉದಾ- ಪ್ರಜಾವಾಣಿ-ಡೆಕ್ಕನ್ ಹೆರಾಲ್ಡ್.ಮುಂತಾದ ಪೇಪರ್ ಹಾಗೂ ಉಪಯುಕ್ತ ಮಾಹಿತಿಗಳನ್ನು ಮೊಬೈಲ್ನಲ್ಲಿ ಅರಿತುಕೊಳ್ಳುವುದು ಬಹಳ ಸಹಾಯಕವಾಗಿದೆ.